സുഹൃത്ത്

അയാൾ
ഊരിപിടിച്ച
കത്തിയുമായ്
അകത്തുതന്നെയുണ്ട്...

പകൽ
കെട്ടിപിടിച്ചു
സെൽഫിക്ക്
ചേർന്നുനിൽക്കും

രാത്രി
പിന്നിലൂടെ
കൈകൾ കെട്ടി
ശത്രുവിന്
മർമ്മം
കാണിച്ചുകൊടുക്കും!

ശേഷം
അജ്ഞാതവും
സുരക്ഷിതവുമായ
കേന്ദ്രത്തിൽ
സുഖവസിക്കും !

അവനാണ്
'സുഹൃത്ത്'  !  

ജ്യോതിഷം

രാഹുകാലവും
ചൊവ്വാദോഷവും
മുഹൂർത്തവും
കല്യാണദിനവും
ഗണിച്ചെടുക്കുന്ന
ജ്യോതിഷിമാർ
ഹർത്താൽദിനം കൂടി
അങ്ങ്പറയണം !
അതാണ്  അതിന്റെ ഒരിത് !
ഏത് ?!

ജട്ടി

'ജാതി'
ഇംഗ്ലീഷിലെഴുതിയപ്പോൾ
'ജട്ടി' എന്നുവായിച്ച
കുട്ടിയുണ്ടായിരുന്നു!

അവൻ
ശരിയായിരുന്നു!
ജാതി
ജട്ടിപോലെയാണ്.
ഇടാം
ഇടാതിരിക്കാം
കളയുകയുമാകാം.

...ആയതിനാൽ
ആതിരയുടെ*
പുടവ
ജാതിക്കോമരങ്ങൾ
കോണകമായി
ഉപയോഗിക്കട്ടെ!

അവർ
മദ്യത്തിന്റെ
ബോധക്കേടിലും
ബോധ്യത്തോടെ
ജാതി
സൂക്ഷിക്കുന്നുണ്ട്!

*ദളിതനെ വിവാഹം കഴിക്കുന്നതിനാൽ പിതാവ് കുത്തിക്കൊന്ന പെൺകുട്ടി 

കാട്

മധുമാർ
ഇനി
നാടിറങ്ങണ്ട !

നാട്ടിൽ
നിയമവും
മനുഷ്യനുമാണ് !

കാട്ടിൽ
കരടിയും
കഴുകനും
നിന്നെ
സംരക്ഷിക്കുo
സ്നേഹിക്കു൦ !

വസന്തം
കാട്ടിൽ
മാത്രമത്രെ !

ഉള്ളി

ഉള്ളീ
ക്ഷമിക്കുക !

നീ
സമൂഹ
സമക്ഷത്തിങ്കൽ
അപമാനിക്കപ്പെട്ടിരിക്കുന്നു !

നിനക്കുവേണ്ടി
ഒരു മനുഷ്യനെ
കൂട്ടം ചേർന്ന്
തല്ലിക്കൊന്നിരിക്കുന്നു !

തൊലിയിൽപോലും
കണ്ണുനീരുള്ള
ഉള്ളീ
നീയെത്ര ശ്രേഷ്ഠം  !

വരണ്ട
കണ്ണുകൾ
ഈ ഭൂമിയെ
മരുഭൂമിയാക്കുന്നു!

ഉള്ളീ
നിന്റെ അപമാനത്തിന്
ഞാൻ
മാപ്പുചോദിക്കുന്നു !

എന്നെയവർ *

മധു. 

മധുരമറിയാത്ത  

കയ്പുമാത്രമറിഞ്ഞ 

ആദിവാസി !

അരിയും മല്ലിയും 

മോഷ്ടിച്ചതാണ് കുറ്റം !

അവനുവേണ്ടി 

ചിലവാക്കപ്പെട്ട കോടികൾ 

നിന്റെ വയറ്റിലായതുകൊണ്ടാണ് 

അവന്  വിശന്നത് ! 

ചിലപ്പോഴൊക്കെ 

വിശക്കുന്നവന്റെ 

ഒരേയൊരവകാശവും 

പ്രത്യയശാസ്ത്രവും 

മോഷണം മാത്രമാണ് !

അമ്മ ഉരുട്ടിത്തന്നത്

തീട്ടമായതുകൊണ്ടാണ്  

ഒരുപിടിച്ചോറിലെ
സ്നേഹവും സൗഖ്യവും
നീയറിയാതെ പോയത് !

അവന്റെ മണ്ണിലാണ് 

നീ മാളിക പണിതത് 

കൃഷിയിറക്കിയത് 

അവനെത്തന്നെ
അടിമയാക്കി 

പണിയെടുപ്പിച്ചത് !

മാറിമാറി വരുന്ന 

അധികാരത്തിന്റെ അപ്പം 

നക്കുന്നതുകൊണ്ടാണ് 

അന്ധയായ നീതിദേവത 

എന്നും നിന്റെ കൈകളിൽ !

കൊടിയും 

പുണ്ണ്യഗ്രന്ഥവും

തിരിച്ചെടുക്കുക !

നിന്റെ തന്തയും തള്ളയും 

ഉണ്ടാക്കിയതല്ലാത്ത 

അവന്റെ  'കാടും മണ്ണും' മാത്രം 

തിരിച്ചുനൽകുക !

സെൽഫിയെടുത്തശേഷം 

സൂക്ഷിച്ചുനോക്കിയോ ?

കാട്ടിലെ  അവനെക്കാളും 

നാട്ടിലെ നീ തന്നെയാണ് 

അപരിഷ്‌കൃതൻ 

ഗുഹാമനുഷ്യൻ!

എന്നിട്ടും ...

*  ശ്രീ മധുവിന്റെ മരണമൊഴി .

കൊലാലയം

കുടിവെള്ളം തേടി

വെള്ളക്കുപ്പി വാങ്ങാൻ

ശമ്പളമില്ലാത്ത  കുട്ടികൾ

പിച്ചക്കാരുടെ ശബ്ദത്തിൽ

സ്റ്റാഫ്‌റൂമിലെത്തി

ദൈന്യതയോടെ വിളിക്കുന്നു

'സാറേ'...!

മൂത്രമൊഴിക്കാൻ

സ്ഥലവും സൗകര്യവുമില്ലാതെ

പെൺകുട്ടികൾ

മൂത്രഗർഭം പേറി നടക്കുന്നു !

കക്കൂസ് ഖജനാവ്

നിറഞ്ഞുകവിഞ്ഞതിനാൽ

സെന്റർ സ്‌ക്വയറിൽ*

'കാര്യം' സാധിക്കുന്ന

ഹോസ്റ്റലിലെ കുട്ടികൾ!

പഠനദിവസങ്ങൾ

കിട്ടിയില്ലെങ്കിലും

ഊഹങ്ങളിൽനിന്നും

ചോദ്യപേപ്പർ

തയ്യാറാക്കേണ്ടി വരുന്ന

മജീഷ്യൻമാരായ

എന്റെ പ്രിയ സഹപ്രവർത്തകർ!

ആകാശത്തുനിന്നും

അപ്പപ്പോൾ വരുന്ന ജോലികൾ

"ഇതെന്റെ ഡ്യൂട്ടിയല്ല

ഇതുനിന്റെ ഡ്യൂട്ടിയാണ് "

എന്നും മറ്റുമൊക്കെ പറഞ്ഞും

പറയാതെ പറഞ്ഞും

ജോലികൾ ചാർത്തിക്കൊടുത്ത്

ശത്രുക്കളായിപ്പോയ

ആത്മമിത്രങ്ങളായ

അനദ്ധ്യാപകവിഭാഗം!

ഇത്

കലകളുടെ മൃതിയിടം.
മഹാ –അരാജകീയം!

തിരക്കായ തിരക്കിനിടയിൽ

ഇത്തിരി സമയം കിട്ടിയിരുന്നെങ്കിൽ

ഒന്നുപോയി കെട്ടിത്തൂങ്ങിയേനെ!

* a shopping mall, near to maharaja's college.